https://www.facebook.com/scholars.say.no.to.PMI/photos/a.601314826602128.1073741828.465613356838943/776084662458476/?type=1&theater;

學生哥齊反普教中：Admin身邊唔少朋友都同我講過，普教中議題好似無乜人關注喎，首先當然要講聲唔好意思，我哋關注組成立咗一年，喺阻止教育局利誘學校推行普教中呢件事上，仍然未進寸功。之但係，喺各位網友、同學、師長前輩嘅協助底下，我哋所做嘅宣傳行動，總算係令普教中得到些微關注。

留意開新聞嘅各位，都知今年各大專院校嘅學生會選情十分激烈，先有退聯之爭，再有莊員懷疑染紅事件，又有候選內閣表示不會出席支聯會六四燭光晚會。相干會眾者固然爲之着緊，旁觀者亦有花生可吃，然而除咗花生外，我哋亦能從中見到「本土」喺香港年輕一代心中嘅地位，越來越重要。

根據我哋嘅資料搜集，香港大學學生會幹事會候選內閣「眀峯」、香港浸會大學學生會幹事會候選內閣「弘毅」、香港教育學院學生會幹事會候選內閣「義」（已當選），喺佢哋嘅政綱裏面均提到「反對普教中」。其中教院嘅學生，即係香港嘅未來教師，都發聲反普教中，實在令人十分鼓舞。至於另外兩枝莊，亦關注唔少本土政治議題，於本土意識嘅發揚，大有裨益。

普教中學生關注組將會繼續宣揚反普教中嘅訊息，但單憑我哋一己之力，係唔足以抗衡赤化嘅宣傳機器，同埋擁有過億公帑撥款權力嘅教育局架。所謂眾志成城，人多好辦事，我哋歡迎各個友好組織，參照或者採用我哋嘅論述，令反普教中理念得以發揚光大。此外，我哋亦希望各大院校嘅學生會同學，上莊之後，能夠同我哋企喺同一陣線，一齊捍衛粵語教學，反對政府利誘搞普教中！