唔使咁興奮住，聽埋先。

利申：嗰位大陸朋友唔係新香港人，喺香港無利益、無物業、無生意、更無護照，但係佢對香港時政見識幾深，竟然識得分本土派裡面嘅枝節！當然，佢好反感偽政權啦。我之前就同佢傾咗幾耐，以下佢所講嘅大致內容，[#0000ff]藍色部分係我認同嘅[/#0000ff]，而[#ff0000]紅色部分係我反對嘅[/#ff0000]。

首先，佢覺得[#0000ff]大陸人，包括底層嘅共奴成日要求香港人做中國人（一部分）係表面嘅叫價。佢覺得內裡嘅含義係希望已經率先發達嘅香港憑藉毗鄰地緣關係、相同文化關係優先提攜帶挈大陸[/#0000ff]。而如果香港只係獨立而唔帶附加條件，噉喺與香港嘅經濟合作上大陸就要面對周邊越南、菲律賓、台灣、馬拉等地嘅競爭。所以喺港共時期香港與呢啲地區嘅關係人為地唔可以好（人質事件）。而印證到上述解釋嘅，就係佢覺得大陸裡面離香港越遠嘅人（北方），對香港問題嘅態度就越強硬，越要求香港被統一。而佢進一步覺得，未來（我諗係滅共之後掛）香港如果要獨立，噉香港同大陸最好就好似以色列同美國噉。喺國際領域上面緊密合作，獨家優先互惠，互相提攜帶挈。而且佢指出，即使香港成功獨立，但只要偽共唔倒台，香港一樣危險，可以參考下下顧忌俄羅斯嘅波蘭、拉脫維亞，甚至烏克蘭。

跟住我地又傾香港本土主義嘅興起。佢認為香港原來無所謂嘅本土派，本土派係由於兩件事驅使嘅。第一件事係英方撤銷抵壘政策，第二件事係中方改革開放。前者使得香港與鄰近嘅地區（珠三角）失去緩衝群體；而後者使到該群體被以文化差異非常大嘅、非鄰近地區嘅大陸北方人為主嘅群體取代，而深圳就相當於戰爭中嘅橋頭堡，被嚴重胡化。佢舉例話東西德統一之前西德就無本土派，只係統一之後西德先有本土派，原理相似。

佢覺得[#ff0000]所謂嘅本土問題其實就係貧富問題、公平問題[/#ff0000]。其他國家都有噉嘅問題，只不過有啲地方因為窮人成分複雜，除咗本土以外仲包括來自四面八方嘅新移民，所以唔可以匯聚成一股力量。而有啲地方，例如西歐，由於穆斯林移民被邊緣化，所以穆斯林原教旨主義興起（唔係恐怖襲擊嗰班）。而香港由於窮人，或者難以向上流動嘅人嘅身份都比較單一，所以本土派興起。所以其實本土主義同穆斯林嘅新移民主義都係同一樣嘢。我諗佢應該係我所謂嘅「經濟本土」。

跟住佢講出一個驚人觀點，就係本土派未來嘅運作模式只能夠同民主黨一樣！我問點解，佢話民主黨其實嘅終極目標就係喺大陸培植內應，使中國行議會民主道路，而共產黨平反六四，清除黨內某邪惡派系之後就演變成在野政黨。所以民主黨嘅重心唔喺香港，which 佢覺得係正確嘅策略。只不過此策略被共產黨識破並拆解，而呢種拆解方法間接催生本土派。而佢一直強調唔係所有本土派都係鬼。佢認為[#0000ff]當權者對付貧窮、社會不公問題，其一就係令對社會不滿嘅人建立一個相互內部認同嘅群體身份，同時其二，不斷輸入群體身份以外嘅，對當權者有相似不滿嘅人，使原來嘅群體變得渾濁，同時強調統一（大家都係……）。此兩方法必須同時使用，雙管齊下，就可以將對準當權者嘅矛盾轉移。[/#0000ff]所以民主黨就被離間。但係，佢覺得此計只會令偽共政權賺頭蝕尾，而真正嘅本土派應該將計就計。因為面對國共一類嘅政黨，唔可以單純通過黨外勢力達致民主，台灣嘅經驗說明，無原住民嘅本土運動就無台灣嘅議會民主！所以香港本土派應該，將計就計，完善並且垂範本土主義，仿效民主黨嘅模式，喺大陸培植分離共存主義，甚至促使地方獨立，以為內應。由於偽共為咗維穩，已經將自己嘅命運捆綁喺大一統主義上，所以只要大一統破產，偽共就會失去統治根基，變成過街老鼠。本土派嘅任務就係將民主黨嘅「議會民主」修改成「先本土自治後議會民主」。而佢話自己好早就覺得城幫派有景轟。因為該派並無解答大陸內部問題，反而將香港本土派扭成以擅自盲目流血革命為目的嘅勇武，騎劫本土，正中對方下懷，將革命力量犧牲於搖籃中。喺香港，暴力方面敵我力量懸殊，所以單純依靠暴力係自曝其短……

（而下面就傾到一啲我地都認為「唔講得」嘅嘢）

有啲199唔好介意，巴絲點睇？