佢只係一碗普通既麵，冇高級既配菜裝飾，冇別緻既餐具使用，亦都冇華麗既裝潢陪襯，有既只係種種回憶、一份人情味。

呢間店舖係位於屯門置樂既ok同咖哩屋附近；細細既店面、簡單既裝潢，舖名叫金順蘭州拉麵店。中四果一年，係我第一年可以出校外食午飯，果陣佢已經存在係置樂，我經常同死黨兼好姊妹BC一齊去食，呢間店舖裝滿住我中學生涯最青春、最開心既回憶同時間。畢業之後，每隔一段時間我就會自己一個黎呢度食中學時期最鐘意食既蘭州餃子拉麵。果陣有學生優惠，叫一碗麵就送一杯豆漿同一碗腐竹薏米豆腐花，價錢都只係$25，而且佢d麵係即日打，打麵既師父通常中午或夜晚先係度，有時佢會即時打麵；唔係學生就叫一碗麵加$5-6先有豆漿或豆腐花，我試過叫齊3樣野都係大約$30幾。宜家加左價，食一碗麵加豆腐或豆腐花要$40。 如果你係落單前冇講明餃子拉麵要咩餃子，佢通常都會俾3粒椰菜餃同2粒韭菜餃；豆漿同豆腐花有凍熱選擇，不過熱豆腐花數量有限，售完即止。


拉麵形狀扁平，有啲似烏冬，幾彈牙。配埋湯底一啖食。


個人黎講係比較喜歡食韭菜餃。


呢款係椰菜餃，味道較為清淡。

餃子皮偏厚，但肉餡都幾多下，所以平衡番。一啖食哂成隻，咬落去果下，肉汁流出黎，真係爽YY。





我最愛佢地整既腐竹薏米豆腐花，因為真係好滑好甜，可以話係入口即融。


顏色呈接近透明兼中間有小小啡色既粒狀物體就係薏米，配埋豆腐花一齊食，薏米煙韌、豆腐軟滑，口感極佳。


黃色呢粒我冇認錯既話應該係白果。通常你食到最底先會見到佢，但我唔食佢的，中學果陣會塞俾老友，叫佢幫我食埋 。

其實味道冇乜大改變，但唔知係唔係因為果陣老友們都陪係我身邊，因為果陣開心，所以先覺得以前既味道比較好？