目前香港市面上催生緊濃烈嘅本土主義。而個人認為唔同人所信守、提倡嘅本土主義其實內涵不盡相同，其實至少應該分成以下幾種。

一、地理本土——
以與自己同喺香港出生、成長、接受教育嘅人視作本土認同嘅主體（即自己人）。此分類以時間為參數調節鬆緊。

二、政治本土——
以與自己持有相似政治經歷（例如逃荒、恐共）及政治立場嘅人（例如反中共黨、三權分立、要求重修憲法等）作為本土認同嘅主體（即自己人）。此分類以政治光譜為參數調節鬆緊。

三、經濟本土——
以，喺香港嘅各種經濟及福利政策對社會群體嘅劃分中，往往與自己劃分為同一類嘅，有相似經濟角色嘅人，作為本土認同嘅主體（即自己人）。此分類以財產為參數調節鬆緊。

以上內容可能令巴絲有啲唔明（尤其係各種參數），下面再詳盡解釋。

首先解釋地理本土。假如你係原居民嘅後代，甚至祖上南宋之前已經生活係香港，噉喺地理上你係最本土嘅。而如果你定嘅時間參數係四九年之前嘅話，噉喺四九年之前從大陸走避香港嘅人嘅後代都算係你嘅自己人；如果將時間參數調鬆一啲，去到抵壘政策結束之前，噉所有呢個年份之前喺香港嘅人及其後代都係自己人；再鬆一啲可以去到九七，甚至莊豐源案之後，將新香港人當作自己人。而如果你祖先唔係原居民，而係喺之後生活喺香港嘅移民，則在此類本土中，必須將之前嘅香港人當做自己人（此處暫且忽略對少數原居民嘅負面印象）。當然，「自己人」嘅意思就唔係平時friend過打band嗰種理解，而大概理解為嗰種互相認同嘅陌生同胞啦。[#00ff00]無論時間參數鬆緊點調節，重點係此種本土係以地理作為基礎區分。[/#00ff00]

再解釋政治本土。政治本土強調嘅係[#ff0000]對北方專制政權嘅對抗，以及對香港淪為冷戰以來所謂共產陣營與所謂資本陣營角力嘅棋子，淪為無法參與博弈，卻屢屢被忽略、犧牲嘅棋子嘅政治局面嘅抗拒[/#ff0000]。所以，此類本土與地理本土嘅顯著差異在於，一方面某啲親共賣港嘅既得利益原居民唔再係自己人，另一方面，海外離地嘅曾經香港人及其後代，雖然佢地喺地理上唔係本土，但只要有相似政治經歷及政治立場，則歸入政治本土中嘅自己人。以政治光譜作為參數，意思係，假如你身體力行支持流動佔領，噉你可以將光譜調鬆啲，將和理非鳩坐佔領等拉嘅歸入自己人，或者你支持社記人力全面拉布，可以將光譜調鬆啲，將有雖有本土理念，但不全面拉布嘅Miss毛同咖喱歸入自己人（當然白鴿黨就肯定唔係自己人）。而此處光譜可以向另一個方向調節，就係將口頭勇武嘅群體歸入自己人；再鬆啲，將使用盾牌嘅歸入自己人；再再鬆啲，將主動襲擊警渣，甚至主張就地搶軍火起義嘅巴打歸入自己人（呢個眾所膠知架啦）。或者你覺得必須調緊啲，以自己為中心太激進或者太溫和都唔得。而因為呢種本土派嘅特征係對抗，所以唔排除歸英撚。

然後解釋經濟本土。經濟本土與以上兩類最大嘅差異係，假設我係經濟本土，我地覺得只要社會福利、教育資源、住房問題、工作機會等分配合理，就唔會介意唔同群體嘅人生活喺同一社區。以大陸新移民為例，我地嘅主張係收回審批權，以及反對過快畀工作年份未夠嘅大陸新移民領取綜援。但[#0000ff]我地唔介意輸入人口及勞動力。總之我地覺得只要公平合理，一切就只係錢嘅問題[/#0000ff]。經濟本土以財產作為參數，意思係，假如我係一個本土窮撚，對本土香港人，我將財產參數向上調鬆，就可以將住私樓嘅中產歸入自己人，再調鬆啲，就可以將不以勞動報酬，而以股息、花紅等資產增值為主要收入來源嘅高產人士歸入自己人，甚至將資本大鱷歸入自己人（不過相信無人會將同好多巴絲嘅阿爺一樣自細喺香港生活嘅李嘉誠家族歸入自己人掛？)。而向另一個方向調節，可以將比自己窮嘅人歸入自己人（即使佢地會享用蛇齋餅糉，或者加入社團，收錢拆鐵馬、打人……）。當然，你可以覺得必須調緊啲，以自己為中心，太富太窮都唔得。此處並非只要財產大約相等就同係自己人，而係指有相似經濟角色，指基於各種經濟及福利政策對社會群體嘅劃分。所以，假如一個大陸新移民即使同我一樣有同等嘅財產，但因為適用於唔同嘅政策，所以唔係自己人（但如前文所述唔一定介意佢移民落來）。

最後，當我同朋友傾呢個問題嗰陣，佢提出仲有第四類本土——文化本土，但我反對。佢以香港嘅特殊語言、習俗為例子。但我認為，首先，香港人當作母語嘅粵語廣府片其實係近一兩百年從廣州一帶傳入，香港原始嘅語言並不統一，有粵語其他片嘅圍頭話，有客家話、有疍家話等等。如果以語言作為本土定義嘅話，噉就唔係香港本土，而係廣東，甚至兩廣本土。而如果以其他特殊習俗為本土定義，例如舞火龍、車公廟、神功戲等等嘅話，噉其實呢啲文化有好多都係近古代從香港以北嘅華南傳入，而且源流極不相同，只不過係由於此等習俗喺北方俾外族政權及共產政權摧毀，花果飄零，以致香港僅存其脈。所以如果以此定本土嘅話，其實就係政治本土。所以個人覺得覺得文化本土無必要自成一類，但既然有異議，於是都設置投票啦。

最最後，個人覺得國屍提倡嘅所謂「本土」好有景轟，但未免先入為主影響巴絲投票，容後再論。