香港有位「討厭政治」嘅歌手王菀之，雖然(聲稱)成日做義工，但似乎對時事一無所知。相反，對岸台灣的雞排妹，雖然不是賣才華，卻頗關心台灣民生，甚至政局。

每個人喺自己嘅fb同微博戶口寫乜嘢，都有自由。藝人喜歡用嚟宣傳自己，得閒po下吃喝玩樂，出埠旅行嘅相，當然開心，不過好多藝人都會利用自己的影響力，喺fb做更多有意義嘅嘢，好似雞排妹鄭家純咁，無論係瘋狗症新聞、台灣士兵洪仲丘枉死事件，就連台灣跟內地簽訂「兩岸服務貿易協議」，都相當關心。

有網民將「兩岸服務貿易協議」對台灣的壞處變成簡易公仔版，雞排妹附上連結，希望更多人留意呢條台灣政府想急急同內地簽嘅協議。根據呢個「簡易公仔版」內容顯示，新協議中，內地人可以無限制跨境「提供服務」，投資移民條件亦相當寬鬆，只要有600萬台幣(約150萬港幣)資產，即可去台灣長居3年，更可以無限期更新簽證。

聽聽下，香港人都應該覺得好驚，或者，已經認命，因為日日港府都批150個單/雙程證強國人嚟香港o架啦.....台灣，都起碼隔住個海，香港，真係好似《進擊之巨人》咁，只要跨過一道牆，就可以大舉入侵，再唔係，喺入境處瞓下地，都有出世紙，係咪?

雞排妹每次放親呢啲留言，總係會引起網民嗌交，有啲人話，台灣咁怕同人競爭，不如退出WTO(世貿)啦，亦都有人話，無限量輸入勞工，老闆最開心，可以無限壓榨工人。一條政策，點樣講，一定有利有弊，只不過，如果係利貪官削平民，為咗表面繁榮的GDP，就可以無所不用其極嗎？而且，常識係，中共用嘅各種經濟手段，最後目的只有一個，就係統戰而已。


雞排妹有樣有身材，仲咁關心民生，真係民主女神都有得你做啦!(蘋果日報)
http://static.apple.nextmedia.com/images/e-paper/20130801/large/1375365401_1235.jpg
雞排妹喺facebook呼籲大家要關注中台嘅「兩岸服務貿易協議」。