今日我又走去city個頹can食狗飯。今日係粟米雞絲飯。
我拎住兜飯，搵位，坐低品嚐。
老實講，其實個飯唔錯；啲粟米汁開得幾靚，雞絲又夠嫩滑，又夠雞味，成個飯可以話已經同狗飯兩個字脫咗勾。
坐係我對面嘅係一位年輕嘅囡囡，佢食緊廿四蚊嘅雙餸飯。佢食到一半已經面露難色，見到咁我就留多口問佢：“你係咪唔舒服啊？”
點知佢忽然拍檯，企起仰天大叫一聲：“呀！~~~~~” 成個飯堂望晒過嚟；佢叫到無氣就成個跌坐番係張櫈，披頭散髮咁。當我回神想走嘅時候，佢忽然又醒番，雙眼發光，然後話：“啲飯黃晒好似隔幾日咁，失敗！啲豆腐冇豆味鬆泡泡一夾就散，失敗中嘅失敗！仲有啲菜啊！都未洗乾淨仲有菜蟲㗎！你睇下！蟲啊！蟲啊喂……”屌食神上身，噴到我走都走唔切。
離開canteen後我係度諗，到底點解佢食個飯可以咁癲？究竟個飯令佢受咗幾大嘅精神衝擊？我諗咗好耐……之後，我發現，雙餸飯其實用咗合理化煙幕。嗰八個餸好似有得比你揀咁，事實上八個都係狗糧；即係話，無論你揀邊兩個餸，都係食緊狗飯！經過今日嘅經歷，我理解咗一件事；就係千奇唔好去城大ac1個頹can食雙餸飯！生命冇take two啊！