我係個位係旺角同十三歲女學生比警察一齊帶番警署嘅十六歲女學生，當時其實仲有一位十三歲嘅男學生一齊去警署，而去到警署無幾耐又有幾位分別係十六、十五、十四嘅女學生及十六歲嘅男學生都係係旺角帶番黎嘅。
容我有少許長氣咁慢慢逐步講，畢竟今晚我實在學到太多野，以下亦都係我自己嘅感覺將所見所聞寫出黎。首先，其實個位十三歲嘅男同學一直係比警察針對著嘅。據個位男學生講佢未行到黎鳩嗚團時已經係另一邊街比警察要求出示身分證，但因為佢嘅歲數而不了了之。當佢過到黎參與鳩嗚其間行走時，只要一比警察發現佢係度，就不斷大聲吆喝身邊嘅cam man去影住佢，而且語氣極為不尊重好大聲咁嗌：「係佢拉！就係佢拉！影住佢拉，大頭阿記住！」後來男學生先逼不得已買左個口罩，係人群中左穿右插咁避開警察。我係一路行時已經一路不斷心寒，警察嘅語氣同態度都好粗魯同激動。因為曾經遇過好態度而且又支持嘅警察，所以一直都覺得唔係個個警察都係咁嘅，由出黎咁多次都堅持住唔對警察口出惡言，以免鬧到無辜警察。但，我錯啦。真正好態度或者支持嘅警察又有幾多個？寥寥無幾，我好後悔當時無出多幾句聲去鬧佢地。
行到去旺角封鎖線個個位，當時本來係未封嘅。人群行緊去馬路時警察就即刻係馬路前封上膠紙，人群向後走時又係後面封上膠紙，進退不得。最可笑嘅係佢地係咁開咪叫我地走，但又封住哂條路。當時另外兩位十四同十三歲嘅女學生及十三歲嘅男學生都企係我附近一齊討論緊情況。前面其中一個帶隊嘅成人比警察點去側邊查身分證，查完過到黎佢苦笑：「警察叫我走喎，行番過黎就後果自負。」個位舉牌伯伯又舉著牌企到好前，後面嘅人同警察又係度嘈，忽然有警察捉住伯伯：「你係咪想走阿？想走跟我過黎！」有四、五個警察一齊好大力咁企圖拉走伯伯，好彩我本來一直都已經因為擔心伯伯而捉住佢，而身邊嘅人見狀過黎幫手成功扯番伯伯。個幾位警員不忿想繼續，即刻有另外一個警察阻止話由佢啦。
之後前面有警察開始查身分證放人走，好多未購物到心儀物品嘅人購物慾未得到解決又唔知警方想點就企係原地，我地三女一男因為係學生就係咁有熱心人士拉我地入人群中央保護我地。但放左少數人走之後我地不知不覺又係幾前嘅位置，後面有人大嗌要去廁所，隨即有好多人和應。警員發惡，好大聲咁凶啲人想去嘅就出黎。男同學亦係和應嘅人之一，警察指著佢大聲咁嗌：「你！企出黎！想去我帶你去！」又有幾個警察撞開幾個人一手就扯住佢拉佢出去，我抱著一個都不能少嘅心態捉住佢嘗試拉佢番黎，可惜以我一人之力根本無辦法捉得實佢。好無恥嘅係，警察一邊用眼睛怒視我粗暴咁拉走佢一邊叫我冷靜啲唔好反抗阿小姐。手一鬆，依個啱啱識嘅朋友就仿佛陰陽相隔，個樣惡影惡相嘅一班警察已經帶左佢去由警察組成嘅警戒線前面。後面嘅人想救都救唔到，一切發生得太快。另外十四歲女學生當時已經不知所蹤，而我同十三歲嘅女學生情緒激動，我忍唔住望住警察大罵：「佢得十三歲咋！學生你都搞！」警察似乎想拉埋我走，兩位熱心市民幫忙拉番我去後面叫我冷靜啲。我嘗試大嗌向後面嘅人講個位男同學比警察扯走左，想用群眾力量去睇下事情可唔可以有轉機。但警察又叫我收聲，兩位熱心市民都問我咁激動博咩姐。無幾耐有警察同我地講：「我地唔係拉個男學生阿，帶佢去廁所就放佢離開架拉！」又有另一個警察好惡咁叫我地兩個女仔出去先，我地唔郁，於是警察又開始想過黎。右邊後巷嘅警察叫我地過去，後面有兩位小姐幫我地出頭，話點可以叫兩個女學生去後巷，仲要係由幾個男警叫。隨即有幾個企警戒線嘅警察同小姐互相指罵，但語氣係好無禮貌同講野好刻薄。鬧鬧下有女警黎到，我地唯有跟佢走。行左幾步企左係個無咁多人嘅位，兩位女警就要求我地出示身分證，之後又就叫我地比個袋佢地搜。兩位熱心市民行過不過係望左我地一眼，警察即刻騷動要求佢地行快啲唔准望，又作勢要攔截佢地。好感激佢地同另外兩位小姐嘅關心。之後繼續搜袋，我好凍手放入衫袋度，佢地立即阻止仲要態度好差，將我地啲野摷出黎擺係地下。搜完袋又搜身，之後就直接帶番警署。
一路係車上面時女警已經好不屑咁話我地咁夜仲聚留係個度，另一個就話唔好同我地浪費口水。攞電話出黎想向朋友講聲又比人阻止，話擔心我地電話唔知裝左啲咩叫我地關機，又想收走我部手機。去到警署女警又要我地行行企企，一入警署竟然見到好多藍絲帶同反佔中人士嘅心意卡，説好的政治中立呢？問屋企人資料要屋企人黎接時語氣又差，講極都可以聽錯我叫咩電話係咩，帶入房等時加埋另一個女學生三個人得兩張櫈。其實我好驚，隻手係咁顫，但都強顔歡笑去講笑想另外兩個女仔放鬆唔好咁驚。看守嘅女警又望著我皺哂眉鬧我無視警局，當個度開緊party咁。出去逐個打電話時，我企係度望一塊啡色玻璃上面藍絲嘅心意卡，女警又挖苦叫我企好唔好再照，以為自己好靚阿？我擰番轉身，女警又話我企到成pat野咁。我承認我站姿係有啲核突，同佢講好攰咁樣企輕鬆啲，佢又話佢都係企左咁耐。我一還口即刻有幾個警察圍住話番我，仲要話我無阿媽教。番到房又多左兩個女學生，其中一個就係之前不知所蹤十四歲個個。加埋有五個，但間房得四張櫈。女警望著我叫我繼續企，十四歲起身比個位我坐，推讓左幾次女警又大大聲鬧叫我地唔好傾計，最後我坐低左。等屋企人其間一直有女警係外面看守，係咁比説話入面聽，但我地就野都唔比講，甚至有女警特登入黎挑釁另外一位十六歲女學生：「嘩你開左第一個file,開唔開心阿？」一片沉默。佢仲要再望住女學生大聲話問你阿，開唔開心阿。我地對面間房就係另外兩位男學生，不時會聽到個邊嘅男警大聲兇個位十三歲嘅男學生，又係房外面大聲嘲笑。男學生家長到走時向我地揮手告別，我回揮，兩位企係門外嘅男警指著我大笑：「嘩佢咁都溝到女喎！」等侮辱性説話。比警察特登要求坐係門邊嘅十三歲女學生擰轉身不過問左一句你地幾歲架，女警即刻鬧佢，佢唔出聲，女警又話做乜成隻死狗咁，傾計時又咁威？仲要叫佢起身企係門外，叫我坐係佢個位（當時佢地女警幾次我地要求調位坐，我又企左係度）。我望著佢地唔郁，女警又更加大聲呼喝叫我坐低，我話我唔處攰唔想坐，幾個女警一齊大聲凶番我：「依度係警署，我叫你做就做！」我心諗：嘩大佬如果你係男警講一句我係咪要自己除定褲比你強姦阿？（我要好誠實咁補充番其實女警鬧我地時我好多時都有話番佢地，不過唔夠人地有權力夠多人。）
我最後都係好懦弱咁坐低左，望著警察，生平第一次咁痛恨警察。由比警察捉走搞左差唔多四個鐘，我先走到，走時仲要又比啲女警奚落下次再番黎。而我亦人生中第一次在警署行出黎，望住個天，忽然覺得好絕望。


捉左幾個十幾歲既靚仔靚妹
十三歲女學生都恰啊屌