上一個post：https://hkgalden.com/view/18093/page/11

估唔到上一個帖收集左咁多位膠民（膠登市民)對三國咁有興趣，好支持上一個post
咁好野我梗唔會畀佢停，立即出個　三國の巨人 ( shoulders of giants)　系列
介紹一下正史中三國既人物, 最希望大家可以以史為鏡, 喺佢地失敗或成功既經驗中, 學識點避免失敗
同樣,個post係歡迎大家發問任何問題, 即使離題問其他人物都得, 只係我會主要講依個人物

[#FF0000]約法三章:[/#FF0000]
1.拋豬引肉, 任何人歡迎自由回答問題

2.問膠野都會答)

3.問任何關於三國既問題都可以

4.答錯歡迎出聲屌

5.三蝦所有資料，皆出自網上大家可自己搵到既資料：三國志、後漢書、華陽國志、獻帝春秋、英雄記等，歡迎自行翻閱
[/size=6]

廢話講完，君子一諾千金，先講一個大家上一個post問既人物，[#008000]呂布軍中最後既大將－陷陣營高順[/#008000][/size=5]！



高順無自己既傳記，即使任何書入面關於佢既資料，都係同佢主公呂布有關。
基本上高順佢既一生，都係同呂布脫唔開關係。所以要了解高順，首先要對呂布有基本既印象。
呂布除左好打之外，係一個乜野人？


呂布的確係一名戰將，兵法熟唔熟讀唔講，但佢經常以一人之力領軍扭轉戰局，亦試過馬上同敵將單挑。「人中呂布，馬中赤兔」唔係演義作，係時人真係咁講。
但講到佢為人，正史入面既佢未必不忠不義，但劉備曾經用過兩個字形容佢：無常。
呂布係好無常既人，佢既決定係經常跟隨時間或人言而轉變，亦好多時無咩諗後果，一馬當先。
或者應該講，佢唔係火鳳入面既呂布咁，做之前計左之後幾十步既智將。而係成日顧住眼前小利，往往令自己進退兩難既人物。
而最有趣既，就係呂布又的確有能力，可以扭轉佢自己造成既困局，佢其實係一個有性格缺憾既人，有強烈既感情色彩，令人不禁又愛又恨。
但今日講既係高順，我地大致知呂布係咩人就得。

英雄記話： 順 為 人 清 白 有 威 嚴 ， 不 飲 酒 ， 不 受 饋 遺 。 所 將 七 百 餘 兵 ， 號 為 千 人 ， 鎧 甲 鬥 具 皆 精 練 齊 整 ， 每 所 攻 擊 無 不 破 者 ， 名 為 陷 陳 營 。
清白，治軍嚴明，唔飲酒，軍隊唔受禮物。依啲野，就算連佢主公呂布都做唔到。所以高順依一個人喺呂布依種人既帳下，已經係一件好神奇既事。
大家亦都見，名傳千古既陷陣營，只有千人。所以大家要明白，陷陣營既重點唔係軍隊本身，係高順領軍既厲害。
但高順好中意直諫，最大件事係高順唔係蠢人，佢係有識之士，所以佢講親，都直中要害。
順 每 諫 布 ， 言 「 凡 破 家 亡 國 ， 非 無 忠 臣 明 智 者 也 ， 但 患 不 見 用 耳 。 將 軍 舉 動 ， 不 肯 詳 思 ， 輒 喜 言 誤 ， 誤 不 可 數 也 」 。 布 知 其 忠 ， 然 不 能 用 。」

高順直接就講呂布既問題，就係唔肯細想，成日根據自己一己喜惡行事，而唔問下部下先。
可見高順真係大將，呂布係十分重視佢，無左佢唔得。如果唔係，以呂布喜怒無常性格，一早已經斬左佢。
究竟依ｄ直諫，陳宮有無講過？我相信陳宮係知道，但佢無提出過，估計佢覺得無咩問題，因為以呂布既能力，即使佢再無常，都會解決得到。
依一種，就造成陳宮同高順既分別。呂布軍中，擦鞋既人太多，只有高順一人直諫，呂布一定唔會中意佢。
呂布係知其忠而不能用，依度可以有好多解釋，可能係知佢忠誠，但實在頂唔順佢咁直接。
但更大機會係，知佢忠誠，但高順實在份人太直，治軍太嚴，標準太高，根本好難同呂布軍中其他將士合作，所以好難重用。（所謂忠臣最難處理，就係咁解）

加上後來呂布畀部下造反，就更加唔信高順，仲削高順兵，偏偏有攻戰時又會叫高順行先死先。
但高順一直都無怨言，佢係唔係真係咁蠢？係唔係真係咁欠缺政治智慧？
又或者話，佢係明知不可為而為之，佢想改變既，係呂布既性格。佢佩服既，係呂布既本事。
但人中呂布，要改變一隻野馬既本性，自然係高順一世人都無可能做到既事，甚至仲會累死佢。

高順第一次出現，係喺三國志魏書既呂布傳入面。
建 安 元 年 六 月 夜 半 時 ， 布 將 河 內 郝 萌 反 ， 將 兵 入 布 所 治 下 邳 府 ， 詣 廳 事 閤 外 ， 同 聲 大 呼 攻 閤 ， 閤 堅 不 得 入 。 布 不 知 反 者 為 誰 ， 直 牽 婦 ， 科 頭 袒 衣 ， 相 將 從 溷 上 排 壁 出 ， 詣 都 督 高 順 營 ， 直 排 順 門 入 。 順 問 ： 「 將 軍 有 所 隱 不 ？ 」 布 言 「 河 內 兒 聲 」 。 順 言 「 此 郝 萌 也 」 。 順 即 嚴 兵 入 府 ， 弓 弩 並 射 萌 眾 ； 萌 眾 亂 走 ， 天 明 還 故 營 。

呂布部將郝萌造反，帶軍入左呂布府中，呂布夜媽媽驚醒唯有帶住老婆逃走，第一時間就係走去搵高順。
當時高順係守都督府，證明佢職都督，係呂布軍中要職。呂布走難時第一時間搵佢，證明呂布好信任高順，一啲都無諗過高順有份謀反。
依次係高順第一次出現。以佢後來平定郝萌，亦可見佢係有謀之將，最少佢既軍事才能唔低，呂布手下做都督，佢亦同呂布無親屬關係（呂布為人用親不用賢），證明佢一定都係一名戰將。

高順第二次出場，係喺呂布打莒城既時候，就黎成功之際，畀臧霸近水樓台搶左。
呂布見到咁，以佢性格，梗係得一個可能：親自去殺左臧霸條仆街，搶番我失去左既野！
高順竟然喺風頭火勢直諫：「 將 軍 躬 殺 董 卓 ， 威 震 夷 狄 ， 端 坐 顧 盼 ， 遠 近 自 然 畏 服 ， 不 宜 輕 自 出 軍 ； 如 或 不 捷 ， 損 名 非 小 。 」
佢既分析係好有道理，呂布一代戰將，個個都怕左佢，佢親自領兵打臧霸，一來臧霸實會守城，二來打唔贏會好樣衰，有損威名。
句句都係喺呂布立場諗，佢真正意思係：「唔係唔打，奉先大人，依ｄ咁既小事，我幫你搞掂就得。」正正係殺雞焉用牛刀之意。
但高順真係一個好直既人，唔識轉彎，竟然講左一句大忌：打唔贏有損將軍威名？呂布有打唔贏既仗？
史料無講呂布反應，但大概當時都唔會好面色，無理高順，立即帶兵出征。去到，臧霸梗係唔敢出黎，最後唯有同臧霸講和。
高順如果出征代呂布打，臧霸都係有名之將，唔會怕高順，反而可能不墜呂布威名咁拎到莒城。
由依件事睇，高順唔係無腦既人，佢對於作戰有佢既一套方法，攻心為上，可惜佢講野好直，無顧到呂布顏面。
依樣，引致左呂布削佢兵，但高順並無怨言。佢亦都唔知，歷史安排畀佢有更重要既任務。

建安三年。高順真正既舞台。
呂布明明之前叫過劉備做細佬：「 請 備 于 帳 中 坐 婦 床 上 ， 令 婦 向 拜 ， 酌 酒 飲 食 ， 名 備 為 弟 。 備 見 布 語 言 無 常 ， 外 然 之 而 內 不 說 。」
當佢上賓，叫佢細佬，但到左建安三年，呂布竟然又因眼前小利，聽袁術講去攻劉備。難怪劉備都話佢無常，簡單ｄ講，神神化化，痴痴地。
呂布既無常唔影響高順對佢既忠心，佢命佢當時削左兵既高順帶住佢既陷陣營去打劉備。
留意，劉備當時喺小沛，係有一定既兵力，仲要當時手下有關張兩名大將，係不容睇小。
而呂布，只命高順一人破之。高順既陷陣營，根據正史記，只有千人。即係呂布調大軍供高順使用，亦不過萬。

然後輕輕一句帶過：「遣 高 順 攻 劉 備 於 沛 ， 破 之 。」
高順一人之力，將大家認為無敵、曹操稱既萬人敵（仲要兩個添）既劉關張三人盡破，好明顯係令到劉備主力軍隊擊潰，仲要無埋小沛，要向曹操求救。
大家要知道，唔好將演義既劉備同正史劉備相比，劉備事實上求人既機會有，但唔多，佢經常都係以自己軍力去打，你睇新野之戰佢帶兵逃亡就知，佢係走都唔會求人幫。
但高順破左佢，連小沛依個立足之處都無埋，高順成功為劉備帶黎致命既打擊。

獨力破劉關張，以為夠？史書又多一句：「太 祖 遣 夏 侯 惇 救 備 ， 為 順 所 敗」
你諗下，曹操手下大將夏侯惇援兵前來，劉備求得曹操，曹操之前已經圖謀徐州，本來就想打呂布，自然會派大將前來應付。
點知高順都係一樣，二話不說，破！
高順就係一個咁既猛將，史書無講佢點打，但大家幻想中，自然奇謀盡出，要敗四名三國中頂頂大名既名將，談何容易？
但高順就喺同一年入面，完成左依件事。記住，佢既陷陣營統兵只有一千精兵，佢係無統領過呂布手下既大軍。
我估當時都無人估到，呂布軍中既高順可以係一名咁既猛將。而依一名猛將，終於迫到曹操要親自出征打呂布。

曹操兵困呂布後，呂布求袁術嫁女不得，以奉先性格，佢決定又再使出佢拿手本領。
英雄記曰：「 布 欲 令 陳 宮 、 高 順 守 城 ， 自 將 騎 斷 太 祖 糧 道 。 」
佢想由軍師陳宮同大將高順守城，自己出兵去打斷曹操糧道。依一招親自領軍退敵，係呂布經常使出既絕招。
而魏氏春秋記亦有提過依件事，陳宮係認為此計可行，佢認為呂布出城，可以夾擊曹軍，係退敵之策。以呂布既能力，陳宮能夠提出，證明此策有一定可行性，甚至可以扭轉局勢。

咁點解呂布無咁做？睇睇英雄記點講：
布 妻 謂 曰 ： 「 將 軍 自 出 斷 曹 公 糧 道 是 也 。 宮 、 順 素 不 和 ， 將 軍 一 出 ， 宮 、 順 必 不 同 心 共 城 守 也 ， 如 有 蹉 跌 ， 將 軍 當 於 何 自 立 乎 ？ 願 將 軍 諦 計 之 ， 無 為 宮 等 所 誤 也 。 妾 昔 在 長 安 ， 已 為 將 軍 所 棄 ， 賴 得 龐 舒 私 藏 妾 身 耳 ， 今 不 須 顧 妾 也 。 」 布 得 妻 言 ， 愁 悶 不 能 自 決 。
此段說話，充份反映到呂布為人，同埋高順同呂布關係，亦畀我地知道，其實將相不和，陳宮同高順係不和。
留意，意見不和並不一定不和，史書講得不和，通常就係二人非一時不合，而係一直唔妥大家。
至於原因我唔喺度深究，但陳宮係呂布既心腹，一直未變。高順同陳宮不和到連呂布老婆都知，證明高順實在太唔識做人，打狗無睇主人面，又難怪呂布唔中意佢。
而呂布亦不太相信高順，我估高順死前知道呂布咁睇佢，一定好難受。
呂布為左老婆一句說話，就認為高順會因為同陳宮既私怨而唔全力守城，睇到依度，實在好難唔令人覺得呂布真係太唔熟悉自己既部下，抵佢死。
就係咁，呂布放棄左出城之策，兵敗受縛。

呂布臨死前，大概佢無諗過自己會死，佢認為曹操一定唔會殺自己。
布 請 曰 ： 「 明 公 所 患 不 過 於 布 ， 今 已 服 矣 ， 天 下 不 足 憂 。 明 公 將 步 ， 令 布 將 騎 ， 則 天 下 不 足 定 也 。 」
以曹操既習性，聽到依番說話，自然以愛才為上，亦都喺天下面前表態：「我連呂布都原諒得，有咩人我唔敢用？」
所以曹操係有豫疑，我認為以呂布既身價，有依種把握都不出為奇，曹操直接殺佢先奇。
點知，呂布叫過做細佬既劉備出聲喇：「「明 公 不 見 布 之 事 丁 建 陽 及 董 太 師 乎 ！ 」
一句說話，點醒左曹操。要一個無常既人幫自己，自己只會成為丁原三世，所以決定要斬呂布。
有話上樑不正下樑歪，但呂布無風骨，佢兩名部下相反忠烈到不得了，陳宮唔降伏刑，高順亦都唔降，隨呂布而死。
就係咁，高順一生人，就係跟隨住依一個一直唔了解佢，亦同佢完全唔夾既主公，過左佢既一生。
佢最精彩時間，係喺佢人生差不多最後既時間，盡破劉關張同夏侯惇之兵，然後跟隨佢主公而去。

講到依度，可能大家就會知道，高順係一名點樣既猛將，實有呂布之七分。
我認為，呂布有高順，猶如劉備之有趙雲，兩個都係忠言直諫，勇猛無比既大將。
可惜，劉備唔聽趙雲講，都仲有諸葛亮重用趙雲，高順就無咁好彩，佢喺呂布既軍中，永遠都係異類。
如果佢唔係咁忠於呂布，難保以佢之才，會成為第二個張遼、第二個張郃，名列三國名將之列。
但佢無咁既機會，歷史將佢放左喺一個咁既位置，注定佢只會係三國中既中上之將。

佢無打過數萬人既大戰，佢無令天下大勢改變，佢甚至救唔到自己主公條命。
但佢曾經喺最後既時光，綻放出咁令人驚訝，咁耀眼既光茫，希望你會喺歷史洪流入面，記得一個忠義可昭天地既將軍－高順。



分享完畢，[#FF0000]由於全屬個人觀點，歡迎轉貼但請講聲[/size=4][/#FF0000]
可隨意發問


中意依個post既朋友，請幫推
大家知依度沉得快架啦