（25分）請論述黃巾之亂及其亂事背後之意義
http://www.vjmedia.com.hk/articles/2014/10/17/88241
Disclaimer：此文章會顛覆你學過嘅歷史觀，不排除閣下會成為汝等痴漢，請考慮自身精神健康狀況，以生命安全及社會大眾未來安全為依歸，十八歲以下人士請由家長導讀，並且唔好當歷史睇就算。

黃巾之亂發生嘅時候，劉氏宗師皇帝大都年幼即位，既無實權，管治時間都較短，東漢正由外戚同宦官交替專權，政治黑暗，吏治敗壞，土地兼併嚴重，和帝嘅時候，鮮卑強大，成為東漢邊患，民不聊生，再加上兩次黨錮之禍，朝中近乎所有忠賢之士被誅殺，每個朝代出現動亂，都係因為嗰個朝代就快終結，黃巾之亂正正就預示咗漢朝嘅滅亡，如果當時唔係社會環境咁差，班農民連食都無得食，出街一個唔覺意得罪人就會畀人拉去角落，光明正大咁毆打，點會咁得閒跟張角三兄弟搞事造反去推翻漢朝，如果佢哋係生活得安安穩穩，豐衣足食，成世人只係需要識得返工，結婚，交配同去旅行嘅話，一定當你呢三兄弟係痴線佬，造反喎，犯法咖，要坐監，要殺頭咖，唔係去到逼不得已嘅地步，邊到有人玩命去造反？

雖然最後黃巾之亂畀人平定，但係佢哋好大程度咁動搖咗漢朝嘅管治根基，為咗要平亂，漢朝皇室下放好多權力，設立咗好多州牧，無錯佢哋最後係成功平亂，但係呢班州牧最後就輕視朝廷，割據一方，雖然一開頭係幫漢朝政府，但係唔好唔記得，最後正式滅漢朝嘅人係曹丕，曹操個仔，一個州牧嘅仔，一個多年來和平穩定嘅朝代最後係畀州牧，呢一班非正規嘅武力推翻，當時政府依賴咁多非正規嘅地方勢力，最後畀人玩返轉頭，而正規軍呢？一開頭係同州牧統領嘅軍隊平亂平得好過癮，立大功，但係最後佢哋嘅下場，一係畀班州牧殲滅，一係就投降做人地俘虜，佢哋因為為咗一時嘅功勞，畀人捉住痛腳喺手，自取滅亡。

官方歷史當然稱之為黃巾之亂，但係點解同樣係造反，法國大革命叫革命？武昌起義叫起義？第一，係因為我哋讀嘅係由以正統為名統治百姓嘅政府所編制嘅歷史，係當時嘅官方媒體同史官畀人用把到刀架係喉嚨上面嘅時候寫落嚟，再經過近代嘅政權修改下，成為我哋喺教科書入面學嘅歷史，而政府當然要用力抹黑反抗嘅人，爭取民意，諗真下，係，佢哋係有搞事，係有搶掠，但係你估其他被稱為革命，起義，解放嘅運動入面無人搗亂？一開頭張角三兄弟係做好事，幫平民百姓醫病，佢哋都係見民不聊生先成功一呼百應，咁點解我哋讀嘅歷史會將呢個歷史事件命名為黃巾之亂，而唔係黃巾起義呢？同樣係農民，陳勝吳廣嘅大澤鄉起義又唔叫大澤鄉之亂？因為政府最唔想見到嘅，就係市民發現造反同搗亂唔一定係負面。第二，被稱做亂亦都係因為黃巾軍最後輸咗，如果佢哋最後贏咗，所謂嘅政府同正統政權有咩機會去抹黑黃巾軍，假如最後佢哋造反成功，推翻當時腐敗嘅政權，誅滅外戚宦官，黃巾軍就會改寫歷史，被稱為義軍，而唔係反賊。

[#3605fc]主流嘅歷史讀得太多，而唔自己去思考下接收嘅內容，只會被洗腦，要記得，主流係畀政府控制，反抗，創造所謂亂世，亂到嘅只係政府創造出嚟，有利政府嘅系統，所謂亂係亂到政府，亂到大商家，亂到達官貴人，亂到當時嘅既得利益者，借帶一提，我認為黃巾軍被擊敗嘅原因，好大程度上係因為當黃巾軍被政府討伐，友軍好多時候唔幫手，要明白，只要你係政府眼中嘅亂黨，唔理你跟邊個大佬都好，你都係同一班人，既然有共同嘅敵人，就全部都係敵人嘅敵人，暫時目標一樣，無必要分黨分派，要鬥過嘅，等最大嘅敵人倒下後，大把時間鬥，另外，黃巾軍佢哋只係識佔地死守，無諗過佔領到之後嘅下一步計劃係咩，日日如是，最後就畀政府拖垮，而地方上嘅村民喺犬儒嘅熏陶之下，都認為所謂嘅漢朝正統係正確嘅，將東漢政府一路以嚟對自己嘅剝削忘記，所以幫政府手打埋呢班本來有機會推翻漢朝腐敗暴政嘅人。[/#3605fc]

中國神話中，盤古創造新世界之前，天地混沌；創世紀中，耶和華創造萬物之前，處於空虛混沌之中；北歐神話中，諸神創造天地之前，同巨人喺亂世之中交戰；希臘神話中，宇宙始於卡俄斯，代表嘅係混沌；創造呢啲神話嘅前人，都明白到混沌同亂係創造新世界嘅起點，唔亂，呢個世界永遠唔會有突破，亂所衝擊嘅係穩定所代表嘅一成不變，黃巾軍所創造嘅亂世，帶嚟嘅係暴政嘅滅亡，新時代嘅開端。

一句到尾，我從來唔認為黃巾軍係暴民亂黨，亦都唔覺得漢朝係正統，係一定唔可以被推翻，唔好唔記得漢高祖都係靠造反先成功建立漢朝，佢都係一個革命者，東漢政府反革命，即係反埋自己，同全世界講，我認我當初係做咗唔見得光嘅事，需要被懲罰，一個政府如果無力再服務人民，而佢經過咁多年都無力自我改善嘅話，就算造反，就算亂，都要推翻佢，因為最後造福嘅，係一般市民同村民，而付出嘅，係一班甘願冒險，賭上名譽同性命，被政府抹黑為反賊，被歷史誣衊嘅義士。

前車可鑒，反抗，只容許成功，不容許失敗。