獨家！佔領袁彌明香閏 教港女勿揀富二代
http://nextplus.nextmedia.com/news/spot/20140923/83370

「人民力量」主席袁彌明Erica性格剛烈就係人都知，但其實佢都有溫柔嘅一面，而且睇法唔同一般港女，揀老公都有自己一套心得。話說今年尾，佢就要嫁比網台主持林雨陽，襯佢仍然單身，爆哥就上咗佢屋企探望。

佢一邊帶爆哥睇佢同林雨陽嘅愛巢，一邊分享佢揀男人嘅理論。簡而言之就係唔好揀有錢人，平凡人反而更好。Erica話︰「由細到大我好多機會釣金龜，但當接觸過金龜，就會發現佢哋唔係太筍。」佢話而家啲富二代，有錢都未必過你手，加上咩都唔識，講嚟講去都係去邊度玩，同佢哋溝通唔到囉。

Erica仲講到已經看破世事咁，話男人無可能同時又上進，又能遷就女人，只能二擇其一。「要上進嘅話，你就必須要忍受佢不細心，唔可以時刻陪住你﹔揀遷就你嘅，就麻煩大家唔好再投訴佢唔上進喇！」Erica講得出做得到，佢未來老公就唔係富二代又唔係有錢佬，佢話寧願大家理想和志趣相同，仲開心咁話哦。爆哥聽完就覺得，你又靚又叻女，當然大把有得揀啦，普通女仔就當作參考囉。