眾所周知，香港人喜歡日式食物已經達到瘋狂境界，不論大街小巷，總不難發現一間日式食店在你身旁。只要你嘴不刁，必定有一間能滿足你一嚐日本料理的心。而餐廳菜單上也肯定可以見到以下三款食物
壽司、拉麵及天婦羅。即使走出日式料理店，你家附近的超市、大x樂大x活及茶餐廳都一定會見到三種食物其一。更甚者，小弟親眼見過糖水店也推出拉麵作招來！
可謂無所不用其極
以上三種料理知名度之大，儼然已經成為日本的代名詞，如整容之於泡菜國一般。
小弟今日要介紹的食物其知名度雖未能與以上三種並駕齊驅，但小弟認為三數載後此品定必能從後趕上，與上述三味成為新一代四天王！
今天深宵食堂將會帶給大家拉麵的朋友、未來日本平民料理代言人-----沾麵

[口語mode]
沾麵日文名叫「つけ麺」(Tsukemen)，同拉麵最大不同地方在於麵與湯分開，而湯底比平常更濃更重口味，食時要將麵夾至湯中浸一浸，等麵掛湯後再食。沾麵的麵底比一般拉麵更彈牙，因為唔洗長期浸住湯所以食幾慢都唔會淋 。食完麵仲可以加清湯落沾汁度飲添！一食兩味，過癮！

有關沾麵的知識我不在此班門弄斧，想個就去呢個網睇http://kenshin.hk/2013/02/20/劍心沾麵研究所-1-沾麵歷史發展及各流派名店介紹/
入面講得好詳細

Anyway，小弟自從兩年前去過西九隱家食沾麵之後就愛上左佢q彈有力嘅麵質 自此之後有沾麵我都會食沾麵而棄拉麵。
但食過幾間店嘅沾麵後發現香港大部份沾麵都係走豚骨路線，而一直搵唔到魚介味嘅沾麵。因此上個月我聽到紅磡新開左間麵店有魚介沾麵就狗衝過去一試究竟。

今天七點左右，小弟終於到左目的地----沾麵真中

好有氣派的大門口

小弟入到去，好霸氣咁叫左[一位 ]之後就獨自坐在店內一角。於四處張望間聽到隔離枱係日本人，根據經驗，有日本人去的餐廳都唔差得去邊，睇來今次有食神了


店內環境，左邊有部製麵機，所有店用的麵都係自製 。

突然店員丟左本menu來

menu做得好有日本味，好似我去日本食燒肉時本menu加埋架離枱日本人
真係以為自己係日本

目的清晰的小弟當然係點招牌魚介沾麵啦，再加個香港未見過嘅炸豆腐球

呢舊就係炸豆腐球 好似巨大麥提莎，店員唔講我諗緊係咪大還丹來


入面有木耳絲、蘿蔔絲咁囉，食起身酸酸甜甜有陣藥味，唔係難食嘅不過唔係我口味囉。Btw點左白色隻醬後都叫食得落口嘅

肉博豆腐球到一半時，主角登場啦！

沾麵：「喂喂企開啲啦 」

無需多講，食佢！

------食評------
沾湯：食開豚骨湯一睇就會覺得呢碗野少油好多，而且無咁濃郁。味道方面佢比較酸甜，似係跟大勝軒的風格所做。飲落有一陣自然嘅鮮味，因為少油關係感覺更易入口，唔會食到一半就感覺好油膩。最重要係佢有好濃的魚味，一入口感覺就好似大啖緊肥美的秋刀魚咁，魚香經喉嚨滲入鼻腔。酸味、鮮味同魚香三劍合壁，令你胃口大開

麵底：一句講完，彈牙有咬口清新不痴牙 佢地個麵唔會好似某啲店咁黏住幾條一餅野，更唔會痴牙。麵身爽滑可以啜啜啜咁入口 。最正係佢地啲麵非常彈牙，你咬佢佢好似識中你棚牙幾拳咁好彈力，單單係嘴嚼已經係一個享受
麵嘅掛湯能力唔差，暫時應該得麵屋武藏的特製麵先掛得多過佢。綜合來講佢隻麵算係數一數二
叉燒：嚴格來講係燒五花腩，無咩特別之處，反而沾湯入面啲角煮又淋又入味仲正


食完麵，加啲清湯飲埋佢
溝淡左魚味，飲起身都幾特別。

總結：真中的沾麵可算係做得很出色，如果你食濃味湯底食到怕可以去試下唔講其他淨係個麵都值得一試，何況佢仲有個壽喜燒湯底係到，我諗遲下我會再去試。

九月預告：中環歌柏絲餐廳 有Live Jazz伴奏的餐廳你去過未？想知入面有咩食環境係點？留意下一篇深宵食堂啦！
感謝收看