真假政經 - 王慧麟
被邊緣化
(2013年06月26日)

話當年一：講緊都二十幾年前，畢業在即，忽然覺得應該留響大學繼續深造，而且唔係要part time，係要full time嗰隻。於是呢，就膽粗粗咁樣報大學嘅修讀式法律碩士課程。吓！好快咁樣，收到一封「拒絕」信，sorry，唔收也。
當時非常沮喪，係未因為成績唔夠好呢？其實自問大學讀書成績，同一pat乜嘢差唔多，幾慚愧下。後來有師兄耳語，因為學系冇全日制嘅資助學位配額，所以收唔到你也。響嗰個時候，開始明白，當時所有大學碩士學位係政府資助嘅，一間大學僧多粥少，係要競爭至攞到，有錢畀都冇用。所以，之後就撲水去英國讀書，此是後話。
響英國讀書嗰陣，撞到香港某大學教書的前輩，講開呢件事，佢嘆曰：其實大學搶到呢啲碩士博士學位都冇乜用，因為香港學生冇乜人想讀，個個本科畢業之後就去搵錢，想讀上去嗰啲已經唔多，仲要佢地讀博士？所以有學位「吉」出來，要出去搵學生。曾幾何時，香江嘅大學係要跪求本地生來讀研究生學位，只不過係二十年前嘅事。後來點樣填番呢啲位？強國學生也。

話當年二：又係講緊二十年前，當時響英國讀完碩士，想留響度讀博士，但係又無水。其中一個想法係試下搵學校老師傾傾，有冇獎學金之類。英國嘅大學，有水嘅就留畀教授做研究，唔會益學生；冇水嘅就「賣」學位搵水，都幾難搵到獎學金。

幾十年前，香港學生響英國可以搵水嘅方法，就係賣「國貨」，即係sell中國，例如China Studies。呢個研究方向，無遠弗屆，個個社科學系都想要。加上強國鎖國，香江學生成為研究強國嘅一個窗口。香江學生大抵可以sell下中國議題，都可以留響學校搵到些少著數，做下研究助理，邊做邊讀咁樣。
到咗二十年前，香港學生sell國貨難度好大。因為貨真價實嘅強國學生開始壓上來。當時能夠離開強國到海外讀書嘅學生，唔係講笑，都係屬於尖子（依家就龍蛇混雜）。佢地有超強嘅謀生技能。我所指嘅係，除咗讀書方面比香江學生刻苦之外，佢地響研究力、關係力、擦鞋力、排擠力都好強橫，加上，坦白講，佢地響強國過來，就係文革後一大批大學畢業知青再用盡方法去海外讀書嘅人，好多年近四十，真係光陰似箭，唔用盡讀書機會，唔通返番強國咩！

整整下，香江學生就被邊緣化。外國大學嘅研究，都好功利。香江學生賣「國貨」，點夠真係強國出來嘅學生賣嘅真「國貨」呢？外國大學會有跨學科中心來研究中國，又點會有一個中心專門研究香江呢？又整整下，香江學生連賣國貨嘅能力都冇。香江學生響讀書力、研究力、關係力、擦鞋力同排擠力都唔夠強國學生嘅時候，咪被邊緣化啦。呢啲情況，響2000年之前，已經響外國學府發生咗。（二之一）




真假政經 - 王慧麟
激進是這樣煉成的
(2013年06月27日)

既然響外國高等學府，香江學生早已被強國學生擠到變成少數「民族」，響香江學府呢？隨住強國學生「攻陷」全球各海外學府來講，響全球化下，香江學府亦無可避免地發生。
噚日講過，二十幾年前，香江各大學要收研究生，要跪求香江學生咁滯。後來香江學府引進唔少強國海歸學者，本地學生收唔夠，但強國學生源源不絕，自然會吸納佢地。有啲嘢，唔怪得人。二十幾年前，大學「求」本地學生讀研究院，冇人肯。當時嗰啲大學老師，留得低嘅都成咗教授級啦，佢地會點樣睇依家香江學生呢？你叫佢地同情依家香江學生升讀研究學位嘅「苦況」？講唔出口也。

仲有係一種新的學術權力結構，已經形成咗。除非嗰個學系係一個同強國意識形態對立嘅學科研究，否則，一個學系總有幾件強國「學者」，響海外讀完博士兼攞埋外國護照「回流」香江之「海歸」。呢班大哥大姐，睇中咗香江嘅大學領導，有多快好省地躋身全球知名大學排名嘅壓力，加上本身響強國仍有一定人脈，於是第一， 先搞一個研究中心，響外國拉一班同聲同氣嘅「海歸」學者來香江做同事，形成一個學系裡面嘅小宗派；第二，同強國大學搞聯合科研，請強國班學者來吃喝玩樂，sorry，唔係，係學術交流；第三，請呢班強國自己友，介紹佢地嘅研究生(係真正有實力嗰隻)，來香江讀研究學位，而且係定期、輪流咁樣做，自然又有成績。有成績，上面自然笑逐顏開。三五七年後，呢個小宗派就會變成大宗派，跟手大家(由上到下)就慢慢升職上位。
呢啲方程式，適合大學領導層(特別係嗰啲連學術都唔識嘅社會賢達)之胃口，適合UGC嗰種要「朝種樹、晚界(刂)板」嘅學術功利主義，又適合海歸學者發展宗派，同北方拉關係搞合作做院士撈政協，真係「三贏」。呢種權力架構，已經響呢十幾二十年內生咗根。依家香江大學生，其實要面對嘅，唔係學位畀人「搶」咁簡單，而係一個由UGC嘅管理機制下，衍生出來之新權力關係網絡。

加埋依家學系冇錢，狂開自資碩士學位搵水，又唔能夠開位請人，唯有請part time教。學系搵到錢，上繳完畀大學之後，留番啲錢畀自己全職教授做研究經費。於是，學生畀高昂學費，全職嗰堆有料老師就唔教，反而外面嗰啲對學系冇乜承擔嘅「學者」就去教，一個學期教完就散水。你當學生係傻的嗎？點會順氣呢？
本地大學生睇嘢直接，將現象射向強國學生搶學位，連帶射向強國學生搶飯碗，正常嘅。講真嗰句，十幾年前響外國發生緊嘅事，依家響香江發生，難道一班素來──負面啲講，讀書懶散、日玩爛玩、語言不通、我唔識政治，或正面啲講──靈活變通、彈性返學、中英夾雜、務實搵食嘅香江學生可以突然團結奮起，勇武地同強國學生競爭？哈哈！你話呢？(二之二)