BBC出品，必屬佳品。

The Paradise係一間維多利亞時期嘅百貨公司。嗰個時代，最出名嘅就係佢嘅fancy，諗起維多利亞，就會聯想起lace，緞帶，充滿曲線同埋裝飾性嘅長裙，好多人都對呢個年代嘅英國有住一種情結。嗰陣啲闊太會有裁縫幫佢哋度身定造用絲綢整嘅裙，得閒就約其它闊太出嚟食個tea，呢啲就係佢哋身份嘅象徴。

一間百貨公司，我哋都知賣嘅係一式一樣嘅嘢，咁究竟佢點樣打入闊太嘅市場呢？佢地點會願意買一啲其他人已經有嘅嘢？The Paradise呢套劇，就係講緊兩個充滿事業心同創見嘅男女主角講緊點樣諗啲唔同嘅idea吸引顧客，最後令到The Paradise成為一間蓬勃發展嘅公司。當然，講起維多利亞時代，描寫男女之間嘅感情少不免，而呢個亦都係呢套劇嘅主要骨幹，推動住成個故事嘅發展。

套劇嘅内容我唔講咁多，因為都係講感情瓜葛比較多。反而我係呢套劇入面留意到嘅係，呢套劇嘅製作係難得地認真，尤其是重現維多利亞時代嘅英國呢方面，做得好細緻，好完美咁還原咗嗰個年代嘅華美同優雅。睇得香港製作嘅劇多，要求好容易越降越低，你知啦，古裝劇有樓是常識吧。所以大家不妨睇呢套劇洗洗眼，感受下祖國嘅榮譽，而且入面真係好多製作細緻嘅靚衫同lady。冇錯，係lady，啲氣質扮唔到。

Paradise，意指天堂，不過同heaven個種淡薄而神聖嘅氣氛唔同，佢係一個允許人悠閒咁享樂嘅地方，係嗰到，所有憂慮都可以一掃而空。要係人間製造呢個paradise，要用錢堆砌出嚟。係故事入面，The Paradise呢個illusion，由顧客嘅錢砌成。而係現實，我相信BBC要做呢套劇，都投資咗唔少錢落背景，令到呢套劇不但好真實，亦都靚得誇張。

講吓主角先：


一開始主角係一個鄉下女仔，啱啱嚟到大城市，你睇到佢啲衫好樸素。


佢做咗店員之後，就會成日見到佢着呢套黑色衫


黑色呢套係The Paradise入面店員嘅指定服裝，雖然樸素，絕對比唔上其它闊太嗰啲衫咁靚咁鮮豔，但係質地同設計已經比之前嗰套好好多。


再後期，佢轉咗呢套，多咗顔色，而呢種subtle嘅紅，亦象徴住佢地位嘅提升


入咗呢間鋪頭做嘢之後，佢慢慢變得唔同，呢套係佢自己嘅衫，雖然睇得出唔貴，衹不過係棉質，但係都俾之前嘅靚咗好多

呢套劇就係喺呢啲小節為落咗好多心思，唔單止係衫，連背景都係。