滙豐早兩日發表環球股市報告降港股評級，但旋即修訂版本淡化「佔中」因素，進退失據，被市場形容為一場公關災難。咁啱得咁蹺，集團企業傳訊聯席主管黎子樑（Charles Naylor），原來做到呢個月底就拜拜，不過兩件事當然無關，因為Charles離職嘅內部通告，兩個禮拜前已發出。

華華就離職一事向滙豐求證，發言人證實已作內部公告。據聞Charles離開後，5號仔全球公關事務，就由另一集團企業傳訊聯席主管高沛賢（Pierre Goad）一統江山，Pierre曾任職《亞洲華爾街日報》，係滙控行政總裁歐智華心腹。

2010年底滙控宮廷政變，歐總接棒CEO，翌年即召高沛賢回巢掌公關聯席主管，不過炒房出身嘅歐總，鍾意內部競爭激勵鬥志，同年5月又聘請瑞信過檔嘅黎子樑做聯席主管。華華曾同Charles喺中環橕枱腳，佢係一個謙謙君子，有緣再會了。 

http://hk.apple.nextmedia.com/financeestate/art/20140710/18794673