係咁的

尋晚响惠康見有泰國榴槤幾靚, 忍唔住買咗pack 返去啦

我知個衰婆唔止唔食, 仲好憎好憎浸味添, 但係唔雪凍又唔好食

於是我將pack 榴槤包住晒, 放入雪櫃最深處啦

點知個衰婆一返黎....

: 咁大浸榴槤味既!

: (頂你前世係咪狗黎), 係咩, 唔覺喎

: 你收埋個榴槤!

: 明知你最憎點會買啫, 可能隔離屋啫

: 你係咪白痴到當我係白痴? 拎! 出! 黎!

: 冇買呀

: 我數3聲, 你唔拎出黎我就去摷雪櫃, 揾到的話, 我都唔知會點對付你!

跟住佢真係數....

: 得! (結果我投行, 交出榴槤 )

: 我俾兩條路你, 一係行出垃圾房掉咗佢, 一係自己落平台食晒佢!

咁我冇出聲, 著拖鞋出門口, 堂堂男子漢唔通同個女人仔吵咩, 我好有風度的

點知一行出門口, 佢叫住我....

: 我估你一定唔會掉, 你食完响會所刷完牙先好返黎!!!! (跟住俾牙膏牙刷我 )

咁好啦, 响平台食完, 刷埋牙, 咪返去囉

禁鐘 (我冇袋鎖時), 點知佢唔開門!!!! 跟住電話响!

: 你同我行返9個字先好返入黎! 一黎等你浸味散, 二黎你吸收咁多糖份, 要做返9個字運動!!!

跟住CUT 線!!

頂你個肺! 香港宜家變成咩地方!!!! 仲講唔講人權!!!!