隔牆有耳：
又係圓方！今次輪到學民仔　
之鋒拍拖睇《竊聽3》

去圓方做乜好？人肉拉筋又得，好似之鋒咁十指緊扣亦得。陳辰攝

■女朋友仔專心揀衫，但之鋒就好似冇乜興趣喎。

■入戲院前，女朋友仔仲去買杯汽水解渴㖭

唔少娛樂圈中人鍾意去圓方商場拍拖睇戲，貪嗰度地方僻靜，好似之前李心潔個導演老公彭順同李悅彤（Liddy）拍拖偷食事件，亦正正係喺圓方上演。

掛住玩電話唔睇衫

原來，學民思潮召集人黃之鋒亦鍾意揀圓方做拍拖勝地，上星期五（6日）下晝4點左右，八方見到黃之鋒同佢位長髮小女友手拖手行街，男嘅着紅色Tee，女嘅就着粉紅長Tee襯白短褲仔同涼鞋，真係青春逼人。

雖然圓方名店林立，但呢對小情侶對貴價名牌完全冇興趣，只係手拖手走咗去平價連鎖時裝H&M睇衫。正如一般普通拖友行街咁，男方通常都係陪女友行街，嗰日都係佢女友喺度揀衫，黃之鋒就企埋一邊玩手機，間唔中女友問佢意見，佢回應吓，相信佢都係對政治同社運較感興趣喇。

結果佢女友揀咗半粒鐘之後，都係得個吉，跟住兩個人去咗戲院買飛睇《竊聽風雲3》。臨入戲院前，女友仲買咗杯汽水解渴㖭。八方之後打畀之鋒，想問佢套戲好唔好睇？之鋒似乎唔想多講私人事，佢話希望傳媒尊重個人私隱，重申佢唔係娛樂圈明星喎。
http://hk.apple.nextmedia.com/news/art/20140609/18750516