http://hk.apple.nextmedia.com/enews/realtime/20140505/52446903

張繼聰攻勢太猛烈，所以阿Kay話抵抗唔到。(攝影：陳志嵐)

當年宅男女神謝安琪(Kay)為老公未婚懷孕，甚至煞停剛起步嘅演藝事業專心生仔，究竟係咩令佢咁死心塌地一齊呢，Kay今日話:「當年佢嘅攻勢太猛烈。」

B餐Kay今日以嘉賓身份，出席內地速配節目《非誠勿擾》喺紅磡舉行香港海選記招，Kay笑指自己戀愛經驗太少，所以擔任唔到節目導師，不過佢都講下自己當年擇偶條件。

好多人都覺得女神梗係要搵番個男神先配得起，不過Kay話自己冇特別鍾意邊一類男士，佢話:「我鍾意你就係你，會鍾意你全部，冇話特別邊類型，不過自己鍾意笑容靚嘅男士。」

Kay仲自爆當初唔係被老公笑容吸引，佢笑住講：「佢當年戴住大烏蠅鏡，其實都唔係好睇到，所以我同佢拍拖都係一個奇聞，可能當年佢嘅攻勢太猛烈。」至於攻勢係乜，Kay甜笑指老公管接管送，又用短訊攻勢、送小禮物、寫歌唱歌，做好多細微嘢，最難得係結婚之後都冇走樣。

至於早前辭演澳門維穩騷而被指得罪新城高層朱明銳，Kay強調事前係接咗一個內地商業活動演出，所以惟有辭演。Kay話：「公司同銳哥一向都溝通得好好，冇不愉快，一切公司會處理。」

談到華納收購金牌大風一事，佢就話本身同金牌大風只有一隻國語碟嘅合約，兼且已經完成宣傳期，所以佢澄清自己並非跟隨金牌大風加盟華納。