狄易達同蔚雨芯BB受訪，兩人同其他歌手一樣，都係話唔知有冇酬勞收，要問番公司。達仔就比較敢言，話:「其實如果市民要去遊行，有冇騷都會去；如果唔去嘅，有冇騷都唔會去。」再謂:「澳門人唔會咁蠢嘅。」

達仔再表示:「我好戥啲artist慘，有政治嘢就嚟問我哋，但又唔問議員，佢哋開會又拉布，又轉珠又睇AV。」至於是否憂成為政治工具？佢就話:「唔驚，我哋係嚟唱歌，而且唔一定係咁諗，澳門人冇咁傻。」又謂:「我如果係喺香港，如果我選擇咗遊行，幾勁嘅騷嚟到都好，我都係照去遊行。」但點睇一眾缺席歌手？達仔話:「我自己有自己想法，唔會同人哋一樣。」



至於蔚雨芯都話有自己立場，又謂:「artist今日嚟都係為咗表演，只望順利完成，其他嘢交俾公司。」問佢驚唔驚今次出騷會被指支持澳門政府？佢就話:「唔會，我支持銳哥，因為呢個騷係新城搞嘅。」蔚雨芯在台上又講多謝銳哥，事後問佢係咪想同新城打好關係攞獎呢？佢梗係話唔係啦，只表示好鍾意呢首歌，想同大家分享喎。

蔚雨芯又謂好難定義個騷是否維穩:「好似5.1、7.1、10月1號呢啲日子，唔通有活動都唔做咩？我唔會扼殺自己表演機會。」總之關乎酬勞及其他政治問題，佢都係話:「不評論，一切交俾公司。」

http://hk.apple.nextmedia.com/enews/realtime/20140501/52434511