中國人有句老話，叫做「買棺材唔知碇」，呢句說話，真係唔知應該送俾最近激嬲咗祖兒嘅杜汶澤，定係送俾今日帶埋成班囡囡到汀九一酒店宣傳節目《怪談‧6魔女》嘅梁思浩喇。

梁思浩話，今次呢個節目，係全球首次，全球首次玩遊戲送棺材及殯儀服務全套。思浩話:「中國人成日話買棺材唔知碇，今次就送俾你，不過我覺得依家最需要嘅係阿澤，如阿澤參加呢個節目，我就送一套俾佢。」



思浩話，預計今次送出嘅「禮物」需六位數字，方法係觀眾喺節目中影低靈異鏡頭，擺上指定網頁，最多人like嗰張就有獎。「禮物」使用期限係十年，如果得獎者未享用到，可轉予朋友家人。真係大吉過你個利是。思浩仲話，傾緊五十萬永久墓地，但未落實。

問思浩係咪真係覺得阿澤好需要呢份「禮物」？思浩就話:「近排咁多話題中，就覺得佢係。中國人有句話，買棺材唔知碇，知碇真係好重要。我知阿澤冇電視台約喺身，歡迎佢嚟玩。」單刀直入問梁思浩:「咁你知碇咗未呀？」佢就話:「我知定碇咗好耐喇。中國人呢句說話真係好特別，阿澤次次辣著人，但未必每次過到關0架。」之後佢又話:「我識阿澤，當年我俾TVB炒，阿澤同（吳）君如喺節目中好撐我，我好感激佢哋，希望問題解決到。」

講講下，思浩又語重心長，「溫馨提示」阿澤:「玩人之前，要知對方是否玩得。我知阿澤玩得，所以先至咁講。」至於張敬軒今日到新城宣傳音樂會，就力撐祖兒話：「我同阿祖識咗好多年，第一次見到佢咁(發火)。佢一向好得體、和善同任勞任怨，正如佢所講，今次真係佛都有火。」軒仔又坦言覺得阿澤今次係玩大咗，並指相信袓兒今次係真的受傷了：「拎佢最介意嘅事嚟講笑，真係傷得佢好深。」

http://hk.apple.nextmedia.com/enews/realtime/20140401/52343287