「In 連尼住, We trust!」一句經常在高登討論區的手機台裡見到的一句留言，這句簡而有力的說話正是道出了近12萬名高登巴絲打們對一個非官方App的信任，此App就是現時最多人使用的高登Android App「LIHK HKGolden」。可是，近日高登管理層決意封殺第三方App，甚至Ban了連尼住於高登的帳戶，表示“將全力阻止這些程式的運作”。相信很快，「LIHK」或「Maize HKG」這類非官方App都難逃被完全block掉的厄運。我們就這事件，找來了「LIHK」的開發者連尼住做了個訪問，希望藉此可以了解多一點背後的原因。
1. LIHK開發了多久，當初開發的原因是什麼？

2010年11月2日開始發行第一版本的LIHK HKGolden, 因為Maize HKG瓜左小倫同重口味Peter又用唔上手, 又想學下寫Android Program, 咪自己寫過個.

2. 過去一直相安無事，但最近3rd party 高登 app卻不能讀取高登討論區，以你所知，高登幾時開始阻止3rd party高登App的運作？

又唔係咁講既, 近期Admin張Topic List改做用異步方式讀取同整埋cache等等呢D係一件好事黎, 直頭一早應該要整啦, 下下Load Database砌一定死得, 但當中真係有小部份不明舉動, 好似加減空間咁, 都唔知想點.

3. 對於今次高登全面Ban非高登官方App的行為，你覺得原因是否就如官方公告中提及的那些顧慮因素，還是純粹的商業決定？

佢有佢地既顧慮, 而我會試下睇下有冇機會可以釋除佢地既疑惑. 因為實際上好多點套係LIHK上面係唔成立, 但套係某D其他第三方高登APP係成立既.

4. LIHK是最多人用的3rd party高登App，近日高登公告中似是暗示了閣下利用高登謀取利益，閣下有何回應？

我整個APP既時候根本未有官方APP…..當中有幾名台主都係我既POST入面留過言支持, 但我都會爭取同Admin溝通既機會, 比大家自由選擇.

5. 扣除App相關所需的開支後，LIHK有沒有為閣下帶來可觀的收入？

基本上沒有多可觀的收入, 一直也要租機櫃換硬件, 早期Smart Phone廣告未有咁普及既時候我係要每個月貼錢的, 最近一年左右真的有可以叫不錯的收入, 但不算可觀吧….

6. 高登公告指出「無人知道此類程式如何處理用戶的登入資料」，請問LIHK是如何處理用戶的登入名稱以及用戶密碼的？

是咁的, 就是在你的手機中, 及直接以Post方式送到高登伺服器, 100%不會傳送到我的伺服器中.

7. 聽聞閣下現時正在開發另一個討論區「膠登」App，那麼日後是否不打算重回高登，而是轉戰「膠登」？

其實…..我問人借左新ac…而佢叫…..連住尼……….

8. 日後還會否繼續開發高登版的LIHK？

我已經電郵Admin告訴他們我希望可以互相合作, 看看他們的回應吧.
==== 以下兩條純屬對「連尼住」名字的相關八掛，相信也有很多人想知吧？ ====
9. 閣下取名連尼住(Lineage)，同以前隻Lineage 天堂Online game 有冇關？

絕對有關, BTW我中二就用呢個名…..

10. 連尼住 同 連住尼，係咪同一個人？兩者有冇關係？

是咁的, 連尼住同連住尼以前就係兩個人黎既, 但自從連尼住比人殺左之後, 佢地就成為左同一個人, 有時佢會係我, 有時佢唔係我….我就黎….精….神….分….裂…..喇



http://android.iloveapps.hk/news/lihk-app-developer-interview/