去年涉及撞傷阿婆嘅回收場工人黎偉祥，外表平凡而且麻甩，不過諗都諗唔到，現年53歲嘅黎偉祥，有個哥哥係法官黎達祥，而另一弟弟就係三屆視帝黎耀祥。

今日有雜誌報道指，黎偉祥由上庭至受柙候判期間，一直冇爆自己身世，就算喺感化官報告內，亦只係略略提及佢有知名人士嘅親屬，不過呢件事喺司法界廣泛流傳開去，成為唔少茶餘飯後話題。原來三兄弟成就各有際遇。



去年中，油塘回收場外發生鏟車撞倒84歲婆婆嘅交通意外，由於婆婆左腳被壓於鏟車輪下，送院後要截肢保命，最終被告黎偉祥被裁定罪成，被罰履行二百小時社會服務令，停牌兩年兼罰款萬九元。

據黎偉祥嘅感化報告內表示，佢有一兄兩弟，兄長係現職司法常務官黎達祥﹑兩個弟弟分別係視帝黎耀祥，另一位則係警務人員。黎偉祥嘅兄弟各有成就，反而黎偉祥就冇乜作為，而今次亦係佢第二次惹官非。

該雜誌採訪被告黎偉祥，外表麻甩嘅黎，同黎耀祥有幾分相似，佢話自己係小人物，冇乜新聞價值，但當記者講出佢啲名人兄弟時，就表現嚴肅，佢喺訪問表示：「唔好講佢哋啦，我唔想影響人哋，各有各生活，我自己嘅嘢，關佢哋乜事啫？」



黎偉祥又話自己係普通人一個，最後佢都肯透露家庭狀況，佢本來係一家七口，黎父係消防員，母親係家庭主婦，起初佢不願多提黎達祥及黎耀祥，自覺身份或有影響，佢喺訪問話：「我哋好耐冇見，各有各生活，最近嗰次都係三年前伯娘死，大家喺靈堂先見一面。」

不過話匣子打開後，佢就慢慢講出疏離原因，原來係與身份同地位有關，係兩個世界的人：「人哋講緊千萬豪宅市道，我就租緊千幾蚊樓，咁邊啱傾？久而久之，佢哋嗌我都唔出啦。」不過佢強調係自己退出姊弟間聚會，而唔係佢哋排斥佢。

黎偉祥又表示當年讀完書做過酒店執房，之後轉行賣魚，亦試過打工及自己開魚檔，佢話賣魚時都有過萬元收入，而祥仔當時只係捱緊配角，人工只得七﹑八千元。對於黎耀祥成為三屆視帝，黎偉祥就話細佬有今日成就，全係佢嘅努力。

至於甚少提及家事嘅黎耀祥，上週六接受雜誌訪問時表示，要記者話畀佢聽，先知哥哥原來惹上官非，黎耀祥喺訪問中話：「其實佢好少同我哋談及自己生活環境問題，我哋幾兄弟姐姐一直都好好感情，但佢選擇過自己生活，我哋冇得強迫。」黎耀祥又話阿哥冇問佢借錢，而幾兄弟各自生活都好獨立，但有聚會。

而問到若哥哥要佢喺經濟上支援，佢會唔會幫忙，黎耀祥就話能力範圍可以的話，一定冇問題。